KNR | పొలాల్లోకి దూసుకెళ్లిన ఆర్టీసీ బస్సు… 30మందికి గాయాలు
గంభీరావుపేట, ఆంధ్రప్రభ : ఆర్టీసీ బస్సు అదుపుతప్పి పొలాల్లోకి దూసుకువెళ్లడంతో ప్రయాణికులు గాయపడ్డ సంఘటన రాజన్న సిరిసిల్ల జిల్లా గంభీరావుపేట మండలంలో శుక్రవారం చోటుచేసుకుంది. కామారెడ్డి నుంచి వేములవాడ వెళుతున్న కామారెడ్డి డిపోకు చెందిన బస్సు పెద్దమ్మ గోరంటాల మధ్య అతివేగంతో వెళ్తూ అదుపుతప్పి గోరంటాల వాగు వద్ద పొలాల్లోకి దూసుకెళ్లింది.
బస్సులో 65మంది ప్రయాణికులు ఉండగా 30మంది ప్రయాణికులు గాయపడ్డారు. అందులో కొంతమందికి తీవ్ర గాయాలు కాగా, మరికొందరికి స్వల్ప గాయాలయ్యాయి. ఎలాంటి ప్రాణాపాయం జరగకపోవడంతో ప్రయాణికులు ఊపిరి పీల్చుకున్నారు. అతివేగమే ప్రమాదం అంటూ ప్రయాణికులు తెలియజేశారు.
